बीएसएनएलकडून अधिकृत यादी जाहीर ; जिल्ह्यात ५जी नेटवर्क विस्ताराला गती
कणकवली
भाजपा नेते तथा खासदार नारायण राणे यांच्या सातत्यपूर्ण पाठपुराव्यामुळे सिंधुदुर्ग जिल्ह्यातील ३१ ठिकाणी ५जी मोबाईल टॉवर उभारणीस मंजुरी मिळाली आहे. केंद्र सरकारच्या भारत संचार निगम लिमिटेड (बीएसएनएल) कडून याबाबतची अधिकृत यादी जाहीर करण्यात आली असून, त्यामुळे जिल्ह्यातील दूरसंचार सुविधा अधिक सक्षम होणार आहेत.
या मंजुरीमुळे ग्रामीण व दुर्गम भागातही ५जी नेटवर्कचा विस्तार होऊन नागरिकांना जलद इंटरनेट, उत्तम नेटवर्क कव्हरेज आणि डिजिटल सेवा सुलभपणे उपलब्ध होणार आहेत.
बीएसएनएलकडून मंजूर झालेल्या टॉवरपैकी देवगड तालुक्यात हिंडळे, कुणकवन, महाळुंगे, मोंड, फणसगाव, पोयरे, तळवडे, तांबडेग, तिरलोट-दाभोळे कातकरवाडी, विठ्ठलादेवी, वेळगिवे या गावांचा समावेश आहे.
दोडामार्ग तालुक्यात कुंभवडे, कणकवली तालुक्यात ओटव फोंडाघाट, कुडाळ तालुक्यात कालेली व कुसगाव, मालवण तालुक्यात बागवाडी, धामापूर, निरोम, राठिवडे, सावंतवाडी तालुक्यात पडवे, माजगाव, सातोळी तर्फ सातार्डा, तांबोळी या गावांना टॉवर मंजूर झाले आहेत.
तसेच वैभववाडी तालुक्यात भोम, जांभवडे, मौंदे, नाणिवडे, तिरवडे तर्फ खारेपाटण, तिरवाडे तर्फ सोंदळ, तर वेंगुर्ले तालुक्यात साखेलेखोल व टांक येथे बीएसएनएलचे ५जी टॉवर उभारले जाणार आहेत.
खासदार नारायण राणे यांच्या मागणीपत्रामुळे आणि केंद्रस्तरावरील पाठपुराव्यामुळे सिंधुदुर्ग जिल्ह्याच्या डिजिटल विकासाला चालना मिळाली असून, भविष्यात जिल्हा ५जी कनेक्टिव्हिटीच्या बाबतीत अधिक सक्षम बनेल, असा विश्वास व्यक्त केला जात आहे.
