उपनगराध्यक्ष अँड. अनिल निरवडेकरः सावंतवाडी नगरपालिकेचा कारभार पूर्णतः पारदर्शक पद्धतीने चालवणार..
सावंतवाडी
भारतीय जनता पार्टी कोणताही जात-पात अथवा धर्म न पाहता सर्वसामान्य कार्यकर्त्यालाही जबाबदारी देते. माझ्यासारख्या एका सामान्य व्यक्तीला उपनगराध्यक्षपदाची संधी दिल्याबद्दल मी पक्षाचे तसेच वरिष्ठ नेते प्रदेशाध्यक्ष रविंद्र चव्हाण, खासदार नारायण राणे आणि पालकमंत्री नितेश राणे यांचा मनापासून आभारी आहे, असा विश्वास नवनिर्वाचित उपनगराध्यक्ष अँड. अनिल निरवडेकर यांनी व्यक्त केला.
निवडीनंतर पत्रकारांशी बोलताना निरवडेकर म्हणाले की, सावंतवाडी नगरपालिकेचा कारभार पूर्णतः पारदर्शक पद्धतीने चालवला जाईल. कोणत्याही बाबतीत दिरंगाई अथवा गय केली जाणार नाही. सर्व नियमांचे पालन करूनच कामकाज होईल.ते पुढे म्हणाले की, सध्या शहरात सुरू असलेली पाईपलाईनची कामे नियमानुसार आणि योग्य पद्धतीने होत असतील तरच ती सुरू ठेवण्यात येतील. अन्यथा अशी कामे थांबविण्यात येतील. नगरपालिकेत कोणत्याही प्रकारचा भ्रष्टाचार खपवून घेतला जाणार नाही. सर्व घटकांना एकत्र घेऊन विकासात्मक कामे करण्यात येतील, असा निर्धारही त्यांनी व्यक्त केला. दरम्यान, कोणावरही टीका करण्याचा आमचा हेतू नाही; मात्र कचरा डेपोच्या मुद्द्यावरून संजू परब यांनी केलेल्या टीकेबाबत आम्हाला वाईट वाटले. संबंधित ठिकाणी त्यांना कार्यक्रम आयोजित करता आला नाही, यामुळेच त्यांनी आमच्यावर टीका केल्याचा टोला देखील अँड. निरवडेकर यांनी यावेळी लगावला.तसेच माझे जिवलग मित्र विनोद राऊळ, विलास जाधव यांनी माझ्यासाठी उपनगराध्यक्ष होण्यासाठी केलेले प्रयत्न बद्दल मी त्यांचे मनापासून आभार मानतो असं देखील त्यांनी यावेळी बोलताना स्पष्ट केले.
