गुजरातच्या सामाजिक कार्यकर्त्या प्रा. दर्शना दोमाडिया यांची प्रमुख उपस्थिती; खेळाडूंचा मोठा सहभाग
सावंतवाडी प्रतिनिधी:
येथील नामांकित ‘संस्कार नॅशनल स्कूल’ मध्ये आयोजित करण्यात आलेल्या भव्य व्हॉलीबॉल स्पर्धेचे उद्घाटन नुकतेच अत्यंत उत्साही आणि भव्य वातावरणात संपन्न झाले. या स्पर्धेला स्थानिक खेळाडू आणि क्रीडाप्रेमींकडून पहिल्याच दिवसापासून उत्स्फूर्त प्रतिसाद मिळाला असून मैदानावर खेळाडूंचा मोठा उत्साह पाहायला मिळत आहे.
या क्रीडा महोत्सवाच्या उद्घाटन समारंभाला प्रमुख अतिथी म्हणून गुजरात येथील प्रसिद्ध सामाजिक कार्यकर्त्या व ‘तेजतारा’ संस्थेच्या अध्यक्षा प्राध्यापक दर्शना दोमाडिया उपस्थित होत्या. तसेच याप्रसंगी प्रा. कक्षा दोमडीया फाउंडेशनचे संचालक व संस्कार नॅशनल स्कूलचे चेअरमन श्री. शेखर जैन, शिक्षिका राधिका फणशीकर, अजय बांदेकर, ओम नाईक, हर्षद डीचोलकर यांच्यासह अन्य मान्यवर उपस्थित होते. उद्घाटन प्रसंगी खेळाडूंना मार्गदर्शन करताना प्रा. दर्शना दोमाडिया यांनी खेळाचे मानवी जीवनातील महत्त्व अधोरेखित केले. खेळामुळे केवळ शारीरिक स्वास्थ्य टिकत नाही, तर खिलाडूवृत्ती आणि शिस्तही जोपासली जाते, असे सांगत त्यांनी सर्व सहभागी खेळाडूंना शुभेच्छा दिल्या.
कार्यक्रमाचे अध्यक्षस्थान भूषवताना चेअरमन श्री. शेखर जैन यांनी शाळेच्या वतीने राबवल्या जाणाऱ्या विविध उपक्रमांची माहिती दिली. या स्पर्धेसाठी निरवडे पंचक्रोशीतील अनेक नामवंत संघांनी आपला सहभाग नोंदवला असून पहिल्याच दिवशी झालेल्या सामन्यांचा थरार पाहण्यासाठी प्रेक्षक वर्गाने मोठी गर्दी केली होती. मैदानावर प्रत्येक संघ दर्जेदार खेळाचे प्रदर्शन करत असून विजयासाठी चुरस पाहायला मिळत आहे.
विद्यालयाच्या वतीने उपस्थित सर्व पाहुण्यांचे यथोचित स्वागत करण्यात आले. ही स्पर्धा यशस्वीरित्या पार पाडण्यासाठी शाळेतील शिक्षक राधिका फणशीकर, अजय बांदेकर, ओम नाईक आणि इतर शिक्षकेतर कर्मचाऱ्यांनी विशेष परिश्रम घेतले आहेत. या व्हॉलीबॉल स्पर्धेच्या आयोजनामुळे निरवडे आणि परिसरातील क्रीडाप्रेमींमध्ये आनंदाचे वातावरण पसरले आहे.
