पत्रकारांच्या हक्कांचे संरक्षण आणि स्वाभिमान जपण्यासाठी नवीन जिल्हा कार्यकारिणी कटिबद्ध
सिंधुदुर्गनगरी:
पत्रकारांच्या न्याय्य हक्कांचे संरक्षण करणे, त्यांच्या विविध प्रश्नांना वाचा फोडणे आणि पत्रकारितेचा स्वाभिमान जपण्यासाठी कटिबद्ध असलेल्या ‘स्वाभिमानी मराठी पत्रकार संघ, महाराष्ट्र राज्य’ या संघटनेच्या सिंधुदुर्ग जिल्हा कार्यकारिणीची घोषणा नुकतीच करण्यात आली आहे. या नूतन कार्यकारिणीमध्ये ‘कोकण दर्शन डिजिटल मीडिया’चे संपादक तथा गेली अनेक वर्षे पत्रकारिता क्षेत्रात निष्ठेने कार्यरत असलेले आनंद धोंड यांची जिल्हाध्यक्षपदी, तर ‘सत्यार्थ महाराष्ट्र’च्या माध्यमातून कोकणातील जनसामान्यांचा बुलंद आवाज बनलेले व्हिडिओ एडिटर साबाजी (बंटी) परब यांची जिल्हा सचिवपदी निवड करण्यात आली आहे. या नियुक्तीची अधिकृत घोषणा स्वाभिमानी मराठी पत्रकार संघाचे कोकण प्रदेशाध्यक्ष, अभ्यासू पत्रकार, संपादक तथा विविध पत्रकार संघटनांमध्ये महत्त्वाची जबाबदारी सांभाळणारे प्रा. रूपेश पाटील यांनी केली आहे.
या निवडीनंतर नवनियुक्त जिल्हाध्यक्ष आनंद धोंड यांनी प्रसिद्धीस दिलेल्या निवेदनात सांगितले की, सिंधुदुर्ग जिल्ह्यासह संपूर्ण कोकणातील पत्रकारांच्या समस्या, त्यांच्यावर होणारे अन्याय, शासकीय स्तरावरील अडचणी आणि पत्रकार संरक्षणाशी संबंधित प्रश्न सोडविण्यासाठी ही संघटना अत्यंत प्रभावीपणे कार्य करणार आहे. पत्रकारांच्या न्याय्य हक्कांसाठी आवश्यक ते सर्व कायदेशीर आणि प्रशासकीय प्रयत्न केले जातील, तसेच पत्रकारांवरील अन्यायाविरोधात प्रसंगी न्यायालयीन लढाई लढण्यासही संघटना मागे हटणार नाही, असा ठाम विश्वास त्यांनी यावेळी व्यक्त केला. संघटनेला अधिक सक्षम व गतिमान बनविण्यावर भर दिला जाणार असून, यासाठी लवकरच जिल्हास्तरीय कार्यकारिणीचा सविस्तर विस्तार करून तालुकानिहाय कार्यतत्पर पदाधिकाऱ्यांच्या नियुक्त्या करण्यात येणार असल्याचेही त्यांनी स्पष्ट केले.
दरम्यान, स्वाभिमानी मराठी पत्रकार संघाचे संस्थापक अध्यक्ष रामकृष्ण (अण्णा) नेरकर आणि महाराष्ट्रातील विविध जिल्ह्यातील पत्रकार बांधवांनी या नूतन जिल्हा कार्यकारिणीचे मनापासून अभिनंदन केले असून त्यांना पुढील वाटचालीस शुभेच्छा दिल्या आहेत. पत्रकारितेची प्रतिष्ठा अबाधित राखत पत्रकारांच्या सन्मान, सुरक्षितता आणि हक्कांसाठी संघटितपणे लढण्याचा निर्धार नव्या कार्यकारिणीने व्यक्त केला असून, या महत्त्वपूर्ण निवडीबद्दल सध्या सामाजिक, राजकीय आणि पत्रकारिता अशा विविध स्तरांतून आनंद धोंड आणि साबाजी (बंटी) परब यांच्यावर कौतुकाचा व अभिनंदनाचा वर्षाव होत आहे.
