वनराई बंधारे पुढील ७-८ महिन्यांसाठी पाणी टिकवून ठेवण्याचा कमी खर्चाचा उत्तम उपाय
जिल्ह्यात ४ दिवसांत ८०० हून अधिक बंधारे
सिंधुदुर्ग:
मागील ३५-४० वर्षांच्या कालावधीत सिंधुदुर्ग जिल्ह्यात यंदा सर्वात निचांकी पाऊस झाला आहे. त्यामुळे भूगर्भातील पाण्याची पातळी खालावली असून, राज्य शासनाने जिल्ह्यात दुष्काळाचा ‘ट्रिगर वन’ लागू केला आहे. या पार्श्वभूमीवर जिल्ह्यात वाहून जाणारे पाणी बंधाऱ्यातून अडवून ते त्याच ठिकाणी जिरवणे, तसेच विहिरी आणि तलावांची पाणीपातळी वाढविणे हा पुढील ७-८ महिन्यांसाठी पाणी टिकवून ठेवण्याचा सर्वात सोपा आणि कमी खर्चाचा उपाय आहे, असे जिल्हाधिकारी तृप्ती धोडमिसे यांनी सांगितले.
कुडाळ तालुक्यातील पिंगुळी ग्रामपंचायत हद्दीतील राऊळवाडी येथे वनराई बंधारा बांधण्यासाठी जिल्हाधिकारी तृप्ती धोडमिसे यांनी स्वतः श्रमदान केले. यावेळी त्या बोलत होत्या. जिल्ह्यात लोकसहभागातून १० हजार बंधारे बांधण्याचे उद्दिष्ट निश्चित करण्यात आले असून, त्यादृष्टीने प्रत्यक्ष कामांना सुरुवात झाली आहे. आज पर्यंत जिल्ह्यात ८०० हून अधिक बंधारे घालण्यात आले आहेत. या उपक्रमामुळे जलसंधारणाच्या कामांचे गांभीर्य नागरिकांमध्ये निर्माण झाले असून, लोकसहभागातून ही चळवळ पुढे जात असल्याचे जिल्हाधिकारी धोडमिसे यांनी सांगितले.
पालकमंत्री नितेश राणे यांच्या अध्यक्षतेखाली झालेल्या बैठकीत जिल्ह्यातील सर्व लोकप्रतिनिधींनी या मोहिमेला चांगला प्रतिसाद दिला आहे. शाळा, महाविद्यालये तसेच विविध शासकीय संस्थांमधील अधिकारी, कर्मचारी आणि विद्यार्थीही या मोहिमेत सहभागी झाले आहेत. सिंधुदुर्ग जिल्हावासी या उपक्रमात उत्तम पद्धतीने सहभागी होत असून, जलसंधारणासाठी लोकसहभागातून व्यापक चळवळ उभी राहत असल्याचे त्यांनी नमूद केले.
वनराई बंधारे हे कमी खर्चाचे असून, पाणी अडवून ते जास्तीत जास्त काळ जमिनीत जिरवणे हा त्यांचा मुख्य उद्देश आहे. कच्चे बंधारे जास्त पावसात टिकत नाहीत. मात्र, त्यासाठी तांत्रिक ज्ञान घेऊन योग्य जागेची निवड करणे आणि बंधाऱ्यावर आवश्यक आच्छादन घालणे गरजेचे आहे. त्यामुळे बंधारा उभारताना तांत्रिक बाबींची योग्य पद्धतीने अंमलबजावणी करण्यात येत असल्याचे जिल्हाधिकारी धोडमिसे यांनी सांगितले.
पक्क्या बंधाऱ्यांच्या संरचनांमध्ये पाणी अडवले जाते. अशा बंधाऱ्यांच्या दुरुस्तीबरोबरच त्यामध्ये साचलेला गाळ काढण्याच्या परवानगीबाबत कालच जलसंधारण विभागाशी चर्चा केली आहे. याबाबत जिल्हा पातळीवरही काही निर्णय घेता येतील का, याची तपासणी सुरू असल्याचे जिल्हाधिकारी धोडमिसे यांनी सांगितले.
सिंधुदुर्ग जिल्ह्यात सुरू असलेल्या जलसंधारणाच्या कामांची इतर जिल्ह्यांकडूनही दखल घेतली जात आहे. या मोहिमेबाबत वरिष्ठ पातळीवरूनही कौतुक केले जात असून, जिल्ह्यात लोकसहभागातून सुरू झालेल्या जलसंधारणाच्या या उपक्रमाला व्यापक प्रतिसाद मिळत असल्याचे जिल्हाधिकारी तृप्ती धोडमिसे यांनी यावेळी सांगितले.
यावेळी उपविभागीय अधिकारी ऐश्वर्या काळूशे, तहसीलदार सचिन पाटील, जिल्हा परिषद सदस्य गंगाराम सडवेलकर, पंचायत समिती सदस्य ममता राऊळ, सरपंच अजय आकेरकर, गट विकास अधिकारी, तालुका कृषी अधिकारी भास्कर चौगुले, मंडळ कृषी अधिकारी विजय घोंगे, गायत्री तेली, सहायक कृषी अधिकारी सविता हरमलकर, नायब तहसीलदार अमरसिंह जाधव, पत्रकार संघाचे जिल्हाध्यक्ष उमेश तोरसकर, कुडाळ तालुका अध्यक्ष विजय पालकर, पत्रकार प्रमोद म्हाडगुत, रोहन नाईक, संजय तेंडोलकर, निलेश ओरोसकर, प्रसाद राणे, एसआरएम कॉलेजचे विद्यार्थी-शिक्षक, राष्ट्रीय सेवा योजनेचे विद्यार्थी यांच्यासह पिंगुळी गावातील ग्रामस्थ आणि ग्रामपंचायत कर्मचारी उपस्थित होते.
